"მზე შინა" ანუ ღვთისმშობლის საგალობელი
დავდივარ მეხის პერანგით,
დავეხელები შენს ნახვას,
მზით დახურული ქვეყანა
- შენა ხარ!
შეთვალებული ყურძენი,
მტევნებით სავსე ხელადა,
მზით დახუნძლული ვენახი
- შენა ხარ!
მზით ავსებულო ბარძიმო,
ცოდვა ტანთ შემოვიხიე,
"უკვდავებისა წყაროის
გემოი -რაკი - ვიხმიე"!
"მზე შინას" საგალობელო,
მზის ცხრავე თვალის სინათლევ,
ცის სარტყელ-საგრილობელო,
ღვთისმშობლის ცრემლთა ზედაშევ...
დაპკურებიხარ ღაწვებზე
გზად მიძინებულ ნინოსა,
და ხელში ჯვარი ვაზისა
შენეულ თმით შეგიმოსავს!
ვარ მოსავალი ქვე-ყანის,
შენ ზე-ყანისთვის მინახავ,
მომმკელი ჩემი პატრონი
ყრმა - შენს მკლავებში მინახავს!
დავდივარ მეხის პერანგით,
დავეხელები შენს ნახვას,
მზით დახურული ზეყანა
და ცისარტყელა
- შენა ხარ!
(ნინო ლარცულიანი)
No comments:
Post a Comment